Heb 1 | ONG | STEP | Sungoi Ma Ili lunkuwepe mete emarengi le le watepe il piti pirpepe manre yaire pouku. Wem ulel wuso lepe, Ma Ili lingiepe tisi wuru piti lirpei kosape manre yaire pouku lire il teingelem nempleiye nempleiye, lato ma ompangiye lo, le ma lunkuwo metine nimou fei lepe le le ma watowo il piti lirpepe manre yaire pouku, wem oli oli, lolpepeye lato.

Hebrews 1

Ninge lite Ma Ili lele lotei lirpouku lire il pite Ma Ili

1 Sungoi Ma Ili lunkuwepe mete emarengi le le watepe il piti pirpepe manre yaire pouku. Wem ulel wuso lepe, Ma Ili lingiepe tisi wuru piti lirpei kosape manre yaire pouku lire il teingelem nempleiye nempleiye, lato ma ompangiye lo, le ma lunkuwo metine nimou fei lepe le le ma watowo il piti lirpepe manre yaire pouku, wem oli oli, lolpepeye lato. 2 Wolo wem fei lepei le wem lingi piti Ma Ili ma nou kesipe mete re men nange laptei lotei, wem fei lepeiye lo Ninge lite Ma Ili lele lotei lirpouku lire il pite Ma Ili. Ninge lotei fei lepei Ma Ili liri piti laltei tef, teplai re men nange pepe, le le lotei so Ma Ili keiniyo piti luntoluwepe men nange pepe wem le laptei pe eti pite Ma Ili. 3 Ninge, le kosauku lire singe pite Ma Ili pele, le le watafei Ma Ili lotei, le il pele olo singe piti pesiepe men nange pratei tulum lelpe lelpe. Le la le teluwi pele noro kaptetei il olpe pite mete piti tef le Ma Ili ma nou onposiepe il olpe pelpe kolo oloye, wem Ninge lepe lolpepei re fei, le le yuwei lifei eti tilpi lite Ma Ili Singetei.

Ninge kali nange ili linuwepe ririm pite yuwei

4 Ninge lite Ma Ili kapi singe lipi linuwepe ririm pite yuwei, min watafei nange wuso Ma Ili watowo lepe re, nange lepe olo ili linuwepe nange pite ririm pepe. 5 Min polpepei so Ma Ili lirpowo riri nele lele lite yuwei lepe, lirpowo fei lolpepei kolo olo, lirpowo lirpolo,

“Ye ninge leiki, fei ki fale kire Eiya leiye.”
Ma Ili lirpei lolpepei liri riri nele lele kolo olo. Lo le lirpei lolpepei liri riri nele re kolo olo wem le lirpei lolpepei,
“Ki ma yaitei lele le le ma ninge leiki.” Olo.
6 Wem Ma Ili laltei ninge oru lele lau tef lepei le lirpei lolpepei,
“Ririm yeflipiye pite Ma Ili pele ma rautuwo.”
7 Le ririm pepe Ma Ili lirpei lolpepei liripe, Ma Ili lirpolo,
“Ma Ili watepe ririm pele singe wata pirpolo singe pite yuf, le mete piti pesio towa lele, le watepe singe wata pirpolo singe pite weli ili.”
8 Wolo Ma Ili nou lirpei liri Ninge lolpepei,
“Ye Ma Ili, ye singe piti untoluwepe men nange wem oli oli, ye ingiepe il tuwopou wem ye untoluwepe mete re men nange pepe. 9 Ye onom nuwope il teingipe tuwopou piti mete ma pingiepe le ye onom pesipe il olpe. Min polpepei so ki Ma Ili leiye, ki keiniye le ki kirine onom peiye teingine wusoli ki keila nange leiye le yuwei inuwepe numuwi peiye.”
10 Ma Ili nou lirpei lasiepe lolpepei,
“Ye Ili, wem linutei ye altei tef le ye ire eti peiye yotei ye altei teplai yuwei. 11 Pe ma pelesesa wolo ye ma ratei ingi wem wem. Pe ma weitei pire olpe tipingou wata pirpolo olongou olpe tipingou pepe. 12 Ye ma onwipe wata pirpolo ye onwipe olongou pepe, le ye miso nou aptei nemple yeflipi wata pirpolo ye nomplei olongou olpe tani le ye nou afo nemple teingipe yeflipi pepe. Wolo ye miso weitei fei olomen olomen kolo olo, le ye miso a kolo olo, ye ratei olpepe ingi wem wem.”
13 Ma Ili lirpowo riri nele lele re kolo olo, lirpowo fei lolpepei,
“Ye ifei eti tilpi leiki lepei ungariki ma kaptei mete eringi peiye pratei ire peiye tef le ye ma olwepe apiri.”
Olo, le lirpowo riri nele lolpepe kolo. 14 Le ririm pepe, pe minemple? Pe yeflipiye pe ririm piti pesio towa lite Ma Ili le le laisipe pau piti ma kaniepe mete wuso Ma Ili keiniepe laptei lotei piti ma pratei pingi wem wem.